RIPVN | វីដេអូឃ្លីបមួយត្រូវបានគេបង្ហោះលើបណ្ដាញអ៊ីនធឺណិតកាលពីចុងខែវិច្ឆិកាកន្លងទៅនេះ បង្ហាញឲ្យឃើញចៅហ្វាយខេត្ត នូសា តឹងហ្ការា ខាងកើត (East Nusa Tenggara) លោក វិកទ័រ បាងទីលូ ឡៃស្កូដាត់ (Viktor Bungtilu Laiskodat) ជាអ្នកនយោបាយកាន់សាសនាគ្រីស្ទាន បានគំរាមកំហែងចាប់ជនជាតិដើមនៅលើកោះស៊ុមបាដាក់គុក ដោយសារតែពួកគេប្រឆាំងនឹងគម្រោងអភិវឌ្ឍលើទឹកដីរបស់ខ្លួន ។
នៅក្នុងខ្សែវីដេអូនេះផងដែរ គេបានឃើញចៅហ្វាយខេត្តរូបនេះបានប្រើប្រាស់ពាក្យពេចន៍ និងកាយវិការមិនសមរម្យ ខ្វះការគោរពចំពោះអ្នកភូមិដែលជាជនជាតិដើមម្ចាស់ទឹកដីទៀតផង ។
មុននឹងឈានដល់ទំនាស់ពាក្យសំដីនេះ ជនជាតិដើមជាម្ចាស់ដីបានធ្វើការចោទសួរពីសិទ្ធិនៃការគ្រប់គ្រងខេត្ត និងភស្តុតាងពីការប្រគល់ដីនេះទៅឲ្យរដ្ឋាភិបាល តែចៅហ្វាយខេត្តរូបនេះបែរជាប្រើពាក្យសំដីមិនសមរម្យដែលប្រដូចជនជាតិដើមទៅនឹងសត្វស្វា ព្រមទាំងគំរាមប្រើអំពើហិង្សា និងចាប់ពួកគេដាក់ពន្ធនាគារដោយចោទប្រកាន់ថាប្រឆាំងនឹងរដ្ឋាភិបាលទៅវិញ ។
បញ្ជាក់បន្ថែមថា គម្រោងអភិវឌ្ឍនេះគឺជាគម្រោងចិញ្ចឹមសត្វត្រូវការប្រើប្រាស់ដីជាង ១០០០ ហិចតាដែលជាដីខេត្តជួលឲ្យសម្រាប់ការអភិវឌ្ឍន៍ឧស្សាហកម្មក្នុងតម្លៃខ្ពស់ឲ្យទៅក្រុមហ៊ុនផលិតអាហារ PT Asian Beef ។
ប្រតិកម្មចំពោះបញ្ហានេះ បានចែកចាយជាមតិសាធារណៈក្នុងបណ្តាញសង្គមដោយលើកឡើងថា អាកប្បកិរិយាលោកចាហ្វាយខេត្តរូបនេះមានភាពក្រអឺតក្រទម និងព្រៃផ្សៃហួសហេតុពេកហើយ ។
ប្រសិនបើរដ្ឋាភិបាលប្រើវិធីសាស្រ្តដោះស្រាយតាមទំនៀមទំលាប់ជនជាតិដើម និងពាក្យពេចន៍សមរម្យចរចា នោះ ទំនាស់នឹងមិនកើតមានឡើង ហើយជនជាតិដើមក៏មិនរងការប្រមាថនោះដែរ ។
លោកប្រធានប្រតិបត្តិនៃវេទិកាឥណ្ឌូនេស៊ីសម្រាប់បរិស្ថានបានអះអាងថា ស្ថាប័នរបស់លោកបានរកឃើញគម្រោងធំៗ មួយចំនួនផ្ដួចផ្ដើមដោយរដ្ឋាភិបាលបានបង្កការបំពុល និងប៉ះពាល់ដល់ជនជាតិដើម តែជនជាតិដើមទាំងនោះមិនទទួលបានសិទ្ធការពារ និងការថែទាំឲ្យសមស្របនោះឡើយ ។
ផលប៉ះពាល់នៃគម្រោងទាំងនោះភាគច្រើនបណ្តាលឲ្យទឹកដីជនជាតិដើមបាត់បង់ប្រសិទ្ធិភាពធ្វើកសិកម្ម ហើយឈានដល់ការបណ្តេញចេញពីទឹកដីកំណើត ឬ ដកហូតដីធ្លីដែលខ្លួនកំពុងរស់នៅតែម្តង ។