RIPVN | កាលពីថ្ងៃទី០១ ខែវិច្ឆិកា ឆ្នាំ២០២១ ជនជាតិដើមប្រេស៊ីលបានអះអាងក្នុងកិច្ចប្រជុំអង្គការសហប្រជាតិស្តីពីអាកាសធាតុឆ្នាំ២០២១ ថា ពួកគេគឺជាកម្លាំងចលករដ៏ខ្លាំងខ្លាអាចជួយការពារព្រៃឈើក្នុងតំបន់អាម៉ាហ្សូនបាន ។
បណ្ដាសម្ព័ន្ធជនជាតិដើមនៅប្រេស៊ីលបានឲ្យដឹងថា ពួកគេបានបញ្ជូនគណប្រតិភូចំនួន ៤០ រូប ដែលជាចំនួនច្រើនជាងគេបង្អស់ក្នុងប្រវត្តិសាស្ត្រប្រជុំអន្តរជាតិ ដើម្បីចូលរួមកិច្ចប្រជុំនេះ នៅទីក្រុងក្លាសស្កូរ ចក្រភពអង់គ្លេស ។
ពួកគេបានបញ្ជាក់ថា ជំនាញ និងចំណេះដឹងប្រពៃណីជនជាតិដើមអាចជួយការពារ និងថែរក្សាព្រៃឈើក្នុងតំបន់អាម៉ាហ្សូន ក៏ដូចជាជួយទប់ស្កាត់ការប្រែប្រួលខ្លាំងនៃអាកាសធាតុបានយ៉ាងល្អ ។
លោកស្រី Sonia Guajajara ប្រធានសម្ព័ន្ធជនជាតិដើមប្រស៊ីលបានបន្ថែមថា ប្រសិនបើមិនមានការការពារសិទ្ធិ និងទឹកដីជនជាតិដើមនោះទេ ដំណោះស្រាយសម្រាប់ការទប់ស្កាត់វិបត្តិអាកាសធាតុនេះក៏មិនអាចទទួលបានផលជោគជ័យនោះដែរ ព្រោះថា ជនជាតិដើមនេះហើយដែលជាគន្លឹះមួយដ៏សំខាន់ក្នុងការដោះស្រាយបញ្ហានេះ។
ស្របជាមួយគ្នានេះ អ្នកអភិរក្សបរិស្ថានក៏បានសិក្សារកឃើញថា ព្រៃឈើក្នុងទឹកដីកុលសម្ព័ន្ធជនជាតិដើមគឺជាតំបន់ដែលទទួលបានការថែទាំល្អបំផុតក្នុងព្រៃអាម៉ាហ្សូន ភាគរយនៃការបំផ្លិចបំផ្លាញនៅទីនោះគឺមានចំនួនតិចតួចណាស់ ។
បញ្ហាចម្បងនាពេលនេះគឺ មានការកាប់ព្រៃឈើខុសច្បាប់ និងការជីករ៉ែក្នុងព្រៃជ្រៅៗ បានឈ្លានពានចូលទឹកដីជនជាតិដើម និងបានបំពុលបរិស្ថាន ប៉ះពាល់ដល់ជីវិតមនុស្សសត្វនៅទីនោះ ។
ប្រតិភូជនជាតិដើមប្រេស៊ីល បានឲ្យដឹងបន្តទៀតថា អ្នកប្រព្រឹត្តអំពើខុសច្បាប់ទាំងនោះមានសកម្មភាពកាន់តែច្រើនទ្វេដង នៅពេលរដ្ឋាភិបាលប្រទេសនេះចាប់ផ្តើមជំរុញឲ្យមានការជីកយករ៉ែ និងអភិវឌ្ឍវិស័យកសិកម្មបែបពាណិជ្ជកម្មទំនើប ។